महिलामन्त्री वादीलाई भेटेर सांसद प्रसाईंले भने- सरकारले अपाङ्गता भएका व्यक्तिको अधिकार सुनिश्चित गर्नुपर्छ
काठमाडौँ। महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षामन्त्री सिता बादी र प्रतिनिधिसभा सदस्य रमेश प्रसाईबीच बुधबार मन्त्रालयमा छलफल भएको छ। भेटमा सांसद प्रसाईंले अपाङ्गता भएका व्यक्तिको अधिकार, समावेशी विकास तथा आर्थिक सशक्तीकरणका विषयमा आफ्ना सुझावहरू राखेका छन्। भेटवार्ताका क्रममा सांसद प्रसाईले अपाङ्गता भएका व्यक्तिको अधिकारसम्बन्धी ऐनको प्रभावकारी कार्यान्वयन, अधिकार संरक्षण, सम्मानपूर्ण जीवनयापन, समावेशी विकास तथा सामाजिक–आर्थिक सशक्तीकरणका लागि आवश्यक नीतिगत तथा व्यावहारिक सुधारका विषयमा आफ्ना सुझाव प्रस्तुत गरे। सांसद प्रसाईले अपाङ्गता भएका व्यक्तिहरूद्वारा उत्पादन गरिएका फिनाइल, धूप, सरसफाइ सामग्री, हस्तकलालगायतका गुणस्तरीय वस्तुको खरिद तथा प्रयोगलाई मन्त्रालय र मातहतका निकायले प्राथमिकता दिनुपर्ने धारणा राखे। उनले यस्ता उत्पादनको बजार सुनिश्चित गर्न सके अपाङ्गता भएका व्यक्तिहरूको आर्थिक सशक्तीकरण र आत्मनिर्भरतामा महत्वपूर्ण योगदान पुग्ने उल्लेख गरे। उक्त सुझावप्रति सहमति जनाउँदै मन्त्री सिता बादीले अपाङ्गता भएका व्यक्तिको अधिकारको संरक्षण, प्रवर्द्धन र आर्थिक सशक्तीकरण नेपाल सरकारको प्राथमिकतामा रहेको बताइन्। उनले अपाङ्गता भएका व्यक्तिहरूद्वारा उत्पादन गरिएका गुणस्तरीय सामग्रीको प्रयोगलाई सरकारी निकायबाटै प्रवर्द्धन गर्नुपर्ने धारणा व्यक्त गर्दै प्राप्त सुझावलाई आवश्यक अध्ययन गरी नीतिगत तथा कार्यक्रमगत रूपमा अघि बढाइने बताइन्।
