सवारी प्रदूषण जाँच्ने एक्ली लक्ष्मी

काठमाडौं : काठमाडौंका व्यस्त र धुलाम्मे सडक। साना–ठूला गाडीहरूबाट निस्किरहेको कालो र निसाससाउँदो धुवाँ। त्यही धुवाँको मुस्लोभित्र मास्क र पीपीई सेट लगाएर एउटा मेसिन समात्दै गाडीको साइलेन्सर चहार्ने एक महिला भेटिन्छिन्। उनी हुन्– वातावरण विभागकी मेकानिकल इन्जिनियर लक्ष्मी श्रेष्ठ। विगत दुई वर्षदेखि काठमाडौं, ललितपुर, भक्तपुर, कीर्तिपुरदेखि चितवनसम्मका सडकमा गुड्ने गाडीको प्रदूषण जाँच्ने एकल जिम्मेवारी उनकै काँधमा छ। सिंगो विभागमा सवारी प्रदूषण जाँच्ने उनी एक्ली प्राविधिक हुन्।